[05.11.2009.] ИКҰ Елбасыны «Мұсылман әлемінің лидері» деп таниды
12:54
Сауд Арабиясы Корольдігінің Джидда қаласында Қазақстан Республикасы Парламенті Сенаты Төрағасының орынбасары Мұхамбет Көпеев Ислам Конференциясы Ұйымының Бас хатшысы Экмеледдин Ихсаноглумен кездесті. М.Көпеев Бас хатшыны Ұйымның құрылғанына 40 жыл толуымен құттықтады және мұсылман елдерінің сындарлы үнқатысуларын дамыту мен саяси еркін біріктірудегі Ұйымның маңызды рөлін атап өтті. Вице-спикер исламның бейбітшілік пен өркендеу діні ретіндегі гуманистік ұстанымдарына негізделген Ұйымды реформалау мен жаңартуға бағытталған ИКҰ күш-жігерін еліміздің қолдайтынын айта келіп, Қазақстан халқы Ассамблеясының 15 сессиясы барысында Президент Н.Назарбаев ұсынған Ұлттық бірлік доктринасының негізгі ережелерін түсіндірді. Э.Ихсаноглу Қазақстандағы ұлтаралық және ұлысаралық келісімді нығайтудағы, сондай-ақ жер жүзіндегі мәдениетаралық және өркениетаралық үнқатысуды дамытудағы Президент Н.Назарбаевтың рөлін жоғары бағалады, қазақстандық басшыны «түркі әлемінің лидері» деп атады. Сондай-ақ Бас хатшы «Ислам Конференциясы Ұйымына төрағалық ету кезеңінде Президент Н.Назарбаев «мұсылман әлемінің лидері» болады» – деді. Кездесуде мәдениеттер мен өркениеттер үнқатысуларын одан әрі ілгерілету Қазақстанның ИКҰ-на төрағалық етудегі күн тәртібінің маңызды бағыттары болатыны аталып өтілді. Ақпарат көзі..
Дінислам.Кз сайты - сайтта жарияланған мақалалар мен жаңалықтарға байланысты жазылған адамдардың көзқарасы мен ой-пікірлерінің жауапкершілігін жүктемейді.
