[06.10.2009.] Талдықорғанда экстремизм мен лаңкестікке арналған «дөңгелек үстел» отырысы өтті - 6 Октября 2009

Ұлттық қауіпсіздік комитетінің Алматы облысы бойынша департаменті мен облыстық прокуратураның қызметкерлері, сондай-ақ үкіметтік емес ұйымдардың өкілдері «дөңгелек үстел» басында жастарға кейбір діни секталардың олардың саналарын улап жатқанын түсіндіруге тырысты.
Танымал дінтанушы және мәдениеттанушы Мұртаза Бұлытайдың айтуынша, дін - қоғам мен ұлттық қалыптастырушы негізгі факторлардың бірі. Мемлекетте әртүрлі діни сенім болса және олар өзара антогоникалық болса, мұның салдары ерте ме, кеш пе, қақтығысқа соқтыруы мүмкін.
«Дінін өзгертіп, кейбір адамдардың теледидар көрмей қойғанын, газет оқымайтынын, қоғамдық өмірге араласпайтынын естіген боларсыздар, себебі оларға «тәлімгерлері» тыйым салған. Діни миссионерлер, халықтың санасын улап, адамдар мен мемлекеттің мүддесіне үш қайнаса сорпасы қосылмайтын өздерінің мақсат-мүдделерін жүзеге асыруда. Олар «діни» деп атап отырған әдебиеттерді ғана оқыған адам дағдарысқа ұшырап, қалыпты, жан-жақты дамыған саналы тұлға ретінде ойлаудан қалады. Адам еркінен айрылып, әлгілердің айтқанына ғана құлақ асатын болады. Сөйтіп, олар қылмысқа баруға да дайын болады. Исламның басқа діндерден айырмашылығы неде? Алла Тағала мен адамның арасында арағайындардың жоқтығында», деп түйіндеді өз сөзін ғалым.
І.Жансүгіров атындағы Жетісу мемлекеттік университетінің философия және саясаттану факультетінің аға оқытушысы Гүлнәр Исағалиева өз баяндамасында экстремистік және лаңкестік қақтығыстардың себептері мен оларды шешудің жолдары туралы әңгімеледі.
Облыстың ішкі саясат департаменті бастығының орынбасары Ғалиасқар Сарыбаевтың айтуынша, республикада бүгінде 2500 діни бірлестік жұмыс істейді, олардың 550-ге жуығы Алматы облысында орналасқан. Ал тіркелмегендері қаншама? ТАЛДЫҚОРҒАН. ҚазАқпарат.