[07.10.2009.] Дәрістер өз жалғасын табуда - 7 Октября 2009

Қазіргі таңда діни экстремизм қаупінің өршуіне көпшілік қауымның діни білімі мен рухани өрісінің жетімсіздігі тікелей әсер етіп отырғандығы белгілі. Осы орайда, әділет департаментінің діни істер бөлімімен облыс тұрғындары арасында діни экстремизмнің мәнісін ұқтыру және оның алдын алу бағытында құқықтық түсіндіру жұмыстары күн тәртібінен түскен емес. Әсіресе өскелең ұрпақ жастарымыздың экстремистік ағымдарға түсіп кетпеуі қоғамды алаңдатып отырған мәселе .
Осындай іс-шаралардың бірі ретінде Маңғыстау облысының әділет департаментімен облыстық білім басқармасының бірлескен жоспарына сәйкес, ағымдағы жылдың 08 қыркүйегі мен желтоқсан айының 24 жұлдызы аралығында облыстың қала, аудан орталықтарындағы орта мектептерде діни мәселелер тақырыбында кездесулер ұйымдастырылуда.
Кездесулер әділет департаментінің діни істер бөлімі қызметкерлерімен қатар, облыс әкімдігінің ішкі саясат, білім басқармалары және ішкі істер департаменті қызметкерлерінің қатысуымен өткізілуде.
Бүгінгі таңда жоспарланған 31 кездесудің 9-ы ұйымдастырылды.
Кездесулер барысында білікті мамандармен облыстағы діни ахуал, тіркелген діни бірлестіктер, дәстүрлі дінді экстремистік бағыттағы ағымдардан ажырата білу, жастардың жаппай дінге бет бұруы ( мешітке бару, намаз оқу, хиджаб кию мәселесі, т.с.с), тәрізді көкейтесті мәселелер бойынша бірқатар толыққанды ақпараттар берілді.
Өз кезегінде мұғалімдер, мектеп оқушылары тарапынан қатысушыларға сұрақтар қойылып, ұсыныс пікірлері ортаға салынды.
Сонымен қатар, кездесулер соңында оқушылардың діни мәселелер бойынша құқықтық сауаттылығын арттыру мақсатында жадынамалар таратылуда. Маңғыстау облысының әділет департаменті.