Қазір халқымыз имандылыққа жақсы бет бұрып келеді. Бұл мәселеде имамдарымыз бен молдаларымыздың еңбегі ерен десек те жарасады. Дін өкілдері жүрген ортасында уағыз айтып, көпшілікті имандылыққа тәрбиелеп отырады. Осындай үлгілі имамдардың бірі Ақболат Әділов (суретте) Мақтаарал ауданына қарасты Ынтымақ елді мекенінде тұрады. Ауылдастары оның имамдық қызметіне дән риза болып, таяуда су жаңа «Матиз» автокөлігін сыйға тартыпты. Біз Ақболат Әділовтің осыншалықты ел сүйіспеншілігіне бөленетіндей қандай қызметі бар екені жайлы А.Қаттани атындағы орталық мешіттің баспасөз хатшысы Мұхамеджан Естеміровтен сұраған едік. «Ақболат Әділов 15 жылдай уақыттан бері Мақтаарал ауданының Ынтымақ ауылында имамдық қызмет атқарып келеді, – дейді М.Естеміров. – Осы уақыт аралығында ол өзі имамдық ететін қауымның сый-құрметіне ие бола білді. Ол кісі өте ізденімпаз. Көптеген шәкірт тәрбиеледі. Мақтаарал ауданында «уахабилік», «сопылық» (зікіршілер) және «хизб-ут-тахриршылар» секілді түрлі экстремистік бағыттағы дін өкілдері көп болатын. Сондықтан осындай ағымдағы азаматтардың жастарға теріс пікір қалыптастырып, дінімізді жексұрын көрсетпеуі үшін алдын-ала көптеген жұмыстар атқарды. Елдің құрметіне бөленуі соның себебі болса керек. Ол көлік мешіт балансына кірмейді. Оны ауылдастары имамның жеке өзіне сыйға тартып отыр». Елі еңбегін елеген имамға біз де көлік құтты болсын дегіміз келеді. Имандылықтың ұйытқысы болатын имамдарымыз көбейсін. Замана газеті.
Дінислам.Кз сайты - сайтта жарияланған мақалалар мен жаңалықтарға байланысты жазылған адамдардың көзқарасы мен ой-пікірлерінің жауапкершілігін жүктемейді.
