[08.10.2009.] Мұсылманның өз еркі, мектепке қалай киінсе...
15:15
Қазақстанда білім ордаларына мұсылманша киім киіп баруға тыйым салынбайды. Мектеп директорлары мен мұғалімдерінің оған тосқау құруға хақысы жоқ. Осылайша еліміздің Әділет министрлігі осыған қатысты дауға нүкте қойып отыр. Әділет министрі Рашид Түсіпбеков өзінің ғаламтордағы блогында Қарағанды тұрғынының «қыз балаларға мектепке хиджабпен баруға бола ма, әлде болмай ма?» деген сауалына осылайша нақты жауап берген. Бұл дау Қарағандыдағы мектептердің бірінің басшысы хиджаб киген жас қызды сабаққа бұлайша келуге ұлықсат етпей қойғаннан кейін қайта бұрқ еткен болатын.
- Қазақстан Конституциясының 22-бабына сәйкес, еліміздің әр азаматының наным-сенім бостандығына құқығы бар. Бұл құқық ел тұрғындарының өздерінің діни ұстанымдарына сәйкес әрекет ету еркіндігінен тұрады. Конституцияның келтірілген қағидасын ескере отырып, заңдар киімге, соның ішінде хиджабқа қатысты республиканың білім беру ұйымдарының оқушылары үшін қандайда бір шектеулер қарастырмайды,- деп түсініктеме береді Әділет министрі Рашид Түсіпбеков. Естеріңізде болса, бұған дейін Әділет министрлігі төлқұжатқа хиджаб киіп түсуге ұлықсат берген болатын.
Дінислам.Кз сайты - сайтта жарияланған мақалалар мен жаңалықтарға байланысты жазылған адамдардың көзқарасы мен ой-пікірлерінің жауапкершілігін жүктемейді.
