[15.10.2009.] Алматыдағы жоғарғы оқу орнының басшылығы ұстаздың намаз оқуына шектеу қоюда
18:00
Намаз оқуға тыйым салды. Алматыдағы бір жоғары оқу орнының басшылығы оқытушының намаз оқуына шектеу қоюда. Ұстаз Жандос Зиявдинов құдайға сабақта емес, үзіліс кезінде құлшылық етем дейді. Оқу ордасының басшылығы, сондай-ақ, оқытушыны студенттерді дінге үгіттейді деп айыптап, қарсылық білдіруде. Жандос Зиявдинов бір аптадан бері колледж мұғалімі санатында жоқ. Ол өз еркімен жұмыстан кету туралы арыз жазған. Қазір бұрынғы оқытушы әділеттілік іздеп, құзырлы органдардың табалдырығын тоздырып жүр. Жандос Зиявдинов, Алматы технологиялық университетіне қарасты технология-экономикалық колледжінің мұғалімі: -Мен 5-10 минут үзіліс уақытында оқып үлгеріп, сабағыма қайта кіре алам. Ал менің үзіліс уақытында намаз оқуыма шектеу қою ол кісілердің менің құқығымды, діни-наным сеніміме аяқ басушылық деп түсінемін. Оқу орнының басшылығы болса, мұсылмандық парызын өтеп жүрген азаматты ұжым әрі студенттер арасында іріткі салып жүр деп айыптайды. Гүлшат Увақасова, Алматы технологиялық университетіне қарасты технология-экономикалық колледжінің директоры: -Біздің колледждің мұғалімі Зиявдинов Жандос Жұманұлы сабақ кезінде оқушыларға намаз оқуға бас иіткізген. Оған оқушылардан түскен мәлімет бар. Және біздің диспетчердің жазған сабақ уақытында, сабақ өткізбей, намаз оқытқызғанын растайтын куәгерлер бар. Жандос Зиявдинов, Алматы технологиялық университетіне қарасты технология-экономикалық колледжінің мұғалімі: - Мен студенттерге “оқыңдар, оқымасаңдар не болады” деп айтқан жоқпын. Сосын әріптестерім сектант депті. Менің ешқандай сектант емес екенімді діни басқарманың кісілері де дәлелдеп бере алады. Негізі колледж ішінде намазға жығылған 89 студент бар екен. Оларға, әсіресе қыздарға хиджап киюге де тыйым салынбаған. Бірақ университет қабырғасында намаз оқуға шектеу қойылыпты. Сондықтан студентер құдайға мінәжат ету үшін жатақханаларына немесе мешітке барады. Ұлан Болатбаев, Алматы технология-экономикалық колледжінің студенті: - Кейде жолда тұрып, кешігіп қаласың, әрине намазхана болса бәрімізге жақсы болар еді. Қалтай Батхалдин, Алматы технологиялық университетінің тәрбие ісі жөніндегі проректоры: -Намаз оқимын десең, айналып кетейін ешқандай әңгіме жоқ. Рұқсат, оқы, бірақ сабақ уақытында емес, оқу ордасында емес, жатақханада оқимын десең оқы, оған ешкімнің қарсылығы жоқ.
Жандос Зиявдиновтың әріптестері- “оның жанжал шығаруының басқа да себептері бар” ,-дейді.
Сәрсебай Орманов, Алматы технологиялық университетіне қарасты технология-экономикалық колледжі директорының оқу ісі жөніндегі орынбасары: -Қазір бұл кісінің бұл мәселені көтеріп тұрған себебі: мына оқу жылынан бері бүгінге дейін бірде-бір әдістемелік құжаттарын, сабаққа қажетті құжаттарын көрсетпегендігінен. Технология-экономикалық колледжінің мұғалімі Жандос бүгінде Алматы қаласының прокурорының атына арыз жазды. Ол оқу орнының арасындағы түсініспеушіліктерді шешу үшін арнайы сот қорғаушысын жалдаған. Бұл мәселенің шешімі прокуратураның тексеруінен кейін белгілі болады. http://kaz.ktk.kz/art/?id=3822
Дінислам.Кз сайты - сайтта жарияланған мақалалар мен жаңалықтарға байланысты жазылған адамдардың көзқарасы мен ой-пікірлерінің жауапкершілігін жүктемейді.
