[16.10.2009.] Қоғамды ұйымдастырудың жаңа рухани жүйесі қажет - Халықаралық конференция
17:30
Бүгін Астанадағы Бейбітшілік және келісім сарайында «Мол адамгершілік пен руханилық - дағдарыстан кейінгі әлемді қайта құрудың тиімді тетіктері» атты халықаралық ғылыми-тәжірибелік конференция өз жұмысын бастады, деп хабарлайды ҚазАқпарат. Оған Қырғызстан, Ресей және Қазақстанның барлық өңірлерінен жалпы 60-тан астам дінтанушы, ҚР Парламентінің корпусы, қоғам қайраткерлері, ғалымдар қатысуда. Негізгі мақсат - Қазақстан және Халықаралық қоғамдастықтың рухани-теориялық бағыттағы тәжірибелерін саралауға бағытталады. Жиында сөз алған ҚР Парламенті Сенатының депутаты Төлеген Мұхамеджанов дағдарыстан кейінгі әлемнің рухани, мәдени қалыбын құру қажеттігі Астанадағы діндер съезінде көтерілгендігін атай келе, бұл мәселе жаһандық тақырыпқа айналып отырғандығын, бүгін басталған Астанадағы конференцияның негізгі әңгіме өзегі де осы болатынын айтып өтті. «Жаһандық дағдарыс күннен күнге өз ықпалын үдетіп бара жатқаны ешкімге жасырын емес. Ал даму бағытын өзгертуге ниеті жоқ тұтынушылық өркениет болса, ол өзінің құлдырау шегіне жеткені айдан анық. Ең алдымен, өзінің материалдық жағдайын жалпы мүдделік игілікпен үлеспейтін мемлекеттер қалайда құрдымға кетпек», деген ол «Әлемдік қауымдастықты ұйымдастырудың бұдан да тиімді тетіктері қажет, білім беру және тәрбие саласында адамның рухани құндылықтарына басымдық берілген жаңа жүйе керек», деп атап көрсетті. Конференцияда ресейлік ғалым, философия ғылымдарының докторы Юрий Бокань бұл идеяға қолдау көрсетіп, «жаңа мыңжылдықта жаңа гуманитарлық әлемдік тәртіп қажеттігін» қоштады. «Ол үшін осынау қиындығы мол дәуірде жаһандану үрдістерін, қалыптасып келе жатқан ашық, ақпараттық және инновациялық қоғамның ерекшеліктерін, білім өркениетінің түзілуін ескеруге тура келеді», дей келе Ю. Бокань, осы идеяны өмірге келтірудің, жаңа тәртіптің негізін қалауға қажетті механизмдерді ұсынды. Жиын соңында ортақ ұсыныстар қабылданып, мемлекет пен қоғамның постдағдарыстық дамуының моделін жасақтау жоспарланған. АСТАНА. ҚазАқпарат.
Дінислам.Кз сайты - сайтта жарияланған мақалалар мен жаңалықтарға байланысты жазылған адамдардың көзқарасы мен ой-пікірлерінің жауапкершілігін жүктемейді.
