Қызылордада "Йегово куәгерлері" сектасының мүшелеріне айыппұл салынды Бірқатар уақыттардан бері Сырдың бойында да сайран салып, белсенділіктерін барған сайын арттырып келе жатқан "Йегово куәгерлері" сектасының мүшелері салық комитеті тарапынан тәртіпке шақырылды, деп хабарлайды ҚазАқпарат тілшісі. Бірлестік кіріс салығы туралы мәліметтерді ұсынбағаны үшін олардың ұйымына – 70 мың, егесі Ермек Тұрдалинге 46 720 теңге көлемінде айыппұл салынған. Қазіргі таңда облыста 21 діни бірлестік тіркеуде тұр. Соңғы уақыттары елімізде түрлі діни ағымдар көбейіп барады. Олардың атқарып жатқан қызметтерінен заңға қайшы әрекеттер табылса да, ешқайсысы жұмыстарын тоқтатудан бас тартпайтын көрінеді. Ал Евангелистік баптистер шіркеуі деген діни бірлестік не тіркелмейді, не заңға бағынбайды. Олардың айтуынша, мемлекеттің заңы жалған, бұларды тек құдай ғана тіркей алады. Өткен жылы үстерінен іс қозғалып, айыппұл салынды. Биыл тағы бой көтеріпті. Істері енді сотқа жолданған. Ал осы тектес сектанттардың арасынан да алаяқтар кездеседі. Өзге елден келген бір миссионер қала азаматшасының сеніміне кіріп, оны алдап, пәтеріне жалған құжаттар толтырып, ақыр аяғында 4 бөлмелі пәтерді шіркеудің атына аударып жіберген. Ол шіркеу әділет департаментіне тіркелген белгілі діни бірлестікке қарайды. Көрер көзге алдаған алаяқтың үстінен қазіргі таңда қаржы полициясы қылмыстық іс қозғады. Салық комитеті де діни бірлестіктердің заңсыздықтарын анықтады. Ақпарат көзі: ҚазАқпарат
Дінислам.Кз сайты - сайтта жарияланған мақалалар мен жаңалықтарға байланысты жазылған адамдардың көзқарасы мен ой-пікірлерінің жауапкершілігін жүктемейді.
