07.09.08. МҰСЫЛМАНДАР ҚАСИЕТТІ ГЕОРГИЙ КРЕСІНЕН БАС ТАРТАДЫ.
03:05
Мұсылмандар Қасиетті Георгий кресінен БАС ТАРТАДЫ
Санкт-Петербург мешіті
Ресей мұсылмандары М.Медведевтен өздеріне жеке әскери марапат тағайындауды өтінеді. Осылайша мемлекеттік атақ беру жүйесін реформалауды ұсынған – Петербургтің ірі діни ұйымы «әл-Фатх», өйтпеген жағдайда мұсылман-солдаттардың Қасиетті Георгий кресінен бас тартуына тура келетінін айтады. «Грузияны бейбітшілікке шақыру операциясына діні ислам ресейлік солдаттар да қатысты. Әрине, олар Отанына адал және шынайы қызмет етті, сондықтан оларға кез келген марапаттың түрі лайық. Бірақ Қасиетті Георгий орденін немесе Георгий кресін оларға тарту ету – діни ар-ожданын аяқ асты етеді», – дейді «әл-Фатх» ұйымы төрағасының орынбасары Жамаладдин Махмұтов ресейлік бір баспасөзге берген сұхбатында.
«Әл-Фатх» ұйымының пікірінше, Қасиетті Георгий кресі – христиандардың символы. «Жақында телеарнадан президент Медведевтің Оңтүстік Осетиядағы оқиғадан кейін әскери госпитальда жатқан солдаттарды сол орденмен марапаттап жатқанын көрсетті. Осыдан кейін бізге қоңырау шалып, мемлекеттің мұсылмандарға креспен құрмет көрсетуіне наразы екенін айтқандар болды», – дейді аталған ұйым төрағасының орынбасары. Мемлекеттік наградалар ережесіне енгізілген соңғы өзгерту бойынша Георгий ордені мен Георгий кресі «басқа мемлекеттердің территориясында халықаралық бейбітшілік пен тұрақтылықты қолдау және қалпына келтірудегі» әскери ерлігі үшін берілетін болып шешілді, әрі ол Ресейдің ең жоғары әскери наградасы болып табылады. Осы мәлімдемеден кейін біз қазақтардың ішінде аталған құрмет-атақпен марапатталғандар бар ма деп іздестіріп көрген едік. Алайда оны біз екі ғасыр бұрынғы тарихтан таба алдық. Мәселен, Қазыбай Черныш пен Әкім Болатов деген аталарымыз орыстың әскерімен бірге Наполеонға қарсы жорыққа шыққан екен. Әкім Болатов 1807 жылы Гейльсберг түбінде француздармен арадағы қарулы қақтығыста көзге түсіп, Қасиетті Георгий орденімен марапатталады. Ал Қазыбай атамыздың өңіріне де 1813 жылы Ресей территориясынан наполеондық әскерлерді тырқырата қуған әскери ерлігі үшін Қасиетті Георгий ордені тағылады. Міне, бұл кісілердің қазір ұрпағы бар ма, бізге белгісіз. Алайда ертең мұсылмандарға арналған осы орденнің орнын басатын басқа бір дүние ойластырылып жатса, Қазақстан тарапы қандай әрекет етуі керек? Бұл сауалдың жауабы, біздіңше, уақыттың еншісінде.
Дінислам.Кз сайты - сайтта жарияланған мақалалар мен жаңалықтарға байланысты жазылған адамдардың көзқарасы мен ой-пікірлерінің жауапкершілігін жүктемейді.
