Діни сенім бостандығы және діни бірлестіктерге қатысты заң жобасы талқыланды
 |
Кеше Мәжілістің Халықаралық істер, қорғаныс және қауіпсіздік комитетінде «Қазақстан Республикасының кейбір заңнамалық актілеріне діни сенім бостандығы және діни бірлестіктер мәселелері бойынша өзгерістер мен толықтырулар енгізу туралы» заң жобасының жұмыс тобының екінші сессиядағы алғашқы отырысы өтті, деп хабарлайды ҚазАқпарат.
Аталған заң жобасына Мәжіліс депутаттары Берік Бекжанов, Тито Сыздықов, Владимир Нехорошев, Нұртай Сабильянов, Наталья Геллерт пен Сенат депутаттары Серік Ақылбай, Анатолий Башмаковтар бастамашы болған. Жұмыс тобына депутат Камал Бұрханов жетекшілік жасады. |
Заң жобасын дайындау қоғамның демократиялық дамуының маңызды факторы болып табылатын мемлекет пен діни ұйымдардың өзара қарым-қатынасын реттеу мәселесін тәртіпке келтіру, діни ұйымдардың құқықтары мен міндеттерін заңды түрде бекіту қажеттілігінен туындап отырғаны белгілі.
Депутаттардың айтуынша, осы жолы ұсынылып отырған өзгерістер мен толықтырулар негізінен діни бірлестіктердің қызметін және құқықтық мәртебесін реттеуге бағытталған. Сондай-ақ мемлекеттің бақылау функцияларын және діни бірлестіктердің жауапкершілігін күшейтуді көздейді.
Заң жобасында діни бірлестіктерді мемлекеттік тіркеу рәсімдеріне байланысты ережелерді нақтылау, заңды тұлға белгілері жоқ шағын діни топтардың мәртебесін, яғни, ұғымын, олардың есептік тіркеу тәртібін, құқығын, діни бірлестіктерден айырмашылығын айқындау нормалары қарастырылған.
Заң жобасына байланысты еліміздің көптеген аймақтарында биылғы жылдың көктемінде кездесулер, дөңгелек үстелдер өткізілді. Онда халықтан көптеген жазбаша, ауызша ұсыныстар алынды. Заң жобасының концепциясы Мәжілістің өткен сессиядағы жалпы отырысында бірінші оқылымда мақұлданған болатын.
Бүгінгі отырыста жұмыс тобының мүшелері заң жобасын салыстырма кесте бойынша талқылады. Оның жұмысына дін және қоғамдық ұйымдардың өкілдері, Бас прокуратураның, Жоғарғы соттың, Әділет, Сыртқы істер министрліктерінің өкілдері қатысып, пікір алмасты.
ҚазАқпарат.
|
