"Жас Алашқа" келген оқырман хаттарынан..... - 4 Января 2009

Жаназа намазына таласушы көп, бұдан түсетiн табыс әжептәуiр. Қабiр басындағы ақша үшiн Құран оқуға таласқан молдаларды көргенде жаның түршiгедi. Мәйiт шыққан үйде уағыздаушы имамдар: «Жаназа шығарушыға қандай мал байласа, сол малы «пырақ» болып, о дүниеде сират көпiрiнен өткiзедi. Малы болмаса, сол мөлшерде ақшаға шақса да болады», – дейдi. Ал мәйiттi қойғаннан кейiн «талқы» оқитындары «қанша қызы болса, сонша қабат плюштен «үлде» жабу керек. Әрбiр үлде 2 метрден кем болмауы керек». «Талқы» деген жоқ, хадисте жазылғандай, сұрақ адам аяғы басылған соң басталады, сонда басқа халықты қырық қадам шегiндiрiп, талқы оқыған молда не Аллаға қарсы, не жын мен перiштеге жауап алдырмай тұрған жоқ па?» десең, имам «мен мәйiтке қандай жауап айтатынын айтып отырмын» дейдi. Тiрiсiнде сәждеге жыға алмағанды өлгенде басын игiздiм дегенге кiм сенедi? Осы нанымсыз жағдайға сенген халық «сауабы тиер ме» деген үмiтпен о дүниеге аттанғаннан ештеңесiн аямайды. Астанада жаназа шығарған имамға екi жүз, не төрт жүз теңге бередi екен, сондықтан да бұл жердегi имамдар бiлiмi жоғары имамға жол бередi, ал басқа жердегi имамдар беделiне қарай орын алады.
Бiрде МАИ-да жұмыс iстейтiн мықтының әкесi қайтыс болып, Өмiрзақ деген қажы сол үйде отыр екен. Бiз барғанда бетiн жауып, жайғастырған имам қайтыс болған кiсiнiң баласының көзiнше: «Мен жаны қысылғанда «Лә иллаха иллаллах» деп айтқыздым, ендi бұл кiсi жәннатқа барады», — дедi. Мен «Өмiрзақ, егерде жәннаттың кiлтi сенiң қолыңда тұрса, бiз бекер намаз оқып, Аллаға жалбарынып жүрмiз, онда сенiң соңыңнан ерейiк» дедiм. Шамданған имам «сiз осы ылғи қисық сөйлейсiз, имам – Алланың өкiлi» дедi. Айта берсеңiз, мұндай келеңсiз жайттар толып жатыр. «Алла, жанымызды жәннатта қыла көр» деп жүргенде, кейбiр оқымысты имамдар жанымызды жаһаннамаға жiберетiн түрi бар.