Алматы қаласындағы Түркісіб мешітінің Бас имамы Ахмет қари Мұхаммеджанов соңғы қажылықта қазақтың дана ақыны Абай Құнанбайұлы үшін бәдәл қажылық өтеп оралды. Ол бұған дейін қазақтың біртуар перзенті Дінмұхаммед Ахметұлы Қонаев үшін де бәдел қажылық жасаған еді. Мұндағы «бәдәл» сөзі арабша, ал қазақша мағынасы «біреудің орнына» дегенді білдіреді. Қазақтың екі алыбының да о дүниелік екені белгілі. Ол екеуі де көзі тірісінде мұсылмандық парызының соңғысы қажылықты өтей алмаған-ды. Ал олардың орнына Ахмет қаридың өтеуіне не себеп болды деген сауалды оның өзіне қойғанымызда ол: – Мен – ұйғыр азаматымын. Кезінде Қытайдан қазақ еліне қоныс аударып келгенімде жергілікті ұлт өкілдерінен көрген жақсылығым аз емес. Оның үстіне сол кезде Қазақстанды басқарып отырған Дінмұхаммед Ахметұлының да шапағаты тиді. Мен мұны ешқашан ұмытуға тиісті емеспін. Қазақ: «Жақсылыққа жақсылық жаса» дейді. Мен соның өтеуі ретінде ең алдымен Қонаевтың орнына, ал соңғы қажылықта дана Абайдың орнына бәдәл қажылық жасадым. Алла қабыл етсін. Өмірім жетіп, мүмкіндігім болып жатса, ешкімді жатсынбайтын қонақжай да, бауырмал қазақ халқының мұнан өзге де мақтан тұтар ірі тұлғалары үшін бәдәл қажылық жасай беру ниетіндемін. Мұсылманға тән көркем мінез-құлық пен әдепке мейлінше суарылған, жаны ізгі, кімге де болса қолынан келгенінше қайырымдылық пен жақсылық жасауға құмбыл, қасиетті Құран Кәрімді бастан аяқ толық жаттап, Пайғамбарымыздың (с.ғ.с.) туған күні – мәуліттерде салауат оқитын қарт қариға мұнан былай да ізгі ойларыңыз іске аса берсін, Алла тағала амалдарыңызға мол сауапты нәсіп етсін деген ақ тілегімізді білдіргіміз келеді. ("Ислам және өркениет" тілшісінен.)
Дінислам.Кз сайты - сайтта жарияланған мақалалар мен жаңалықтарға байланысты жазылған адамдардың көзқарасы мен ой-пікірлерінің жауапкершілігін жүктемейді.
