[28.01.2009.] Нұрсұлтан Назарбаев: Әлемге ортақ валюта керек - 28 Января 2009

Қазақстан Президенті Нұрсұлтан Назарбаев әлем елдеріне аймақтық валютаның орнына ортақ әлемдік валюта жасауды қажет деп санайды. Бұл туралы Мемлекет басшысы Үндістанға жасаған сапары барысында екі ел кәсіпкерлерінің бизнес-форумында мәлімдеді.
Нұрсұлтан Назарбаевтың сөзіне қарағанда, қазір әлем елдері экономикалық дағдарысты бастан кешуде және одан кейін әлем қалай болатындығы туралы нақты жауап жоқ. Оның жауабы да бұрынғыдай болмайды. Қазір көп елдерде аймақтық валюта жайы жиі сөз болады. Оның ішінде, Латын Америкасы, Араб елдерінде, ТМД ауқымында да сондай пікірлер бар.
Қазақстан Президентінің ойынша, егер әлем осылай аймақтық жіктелу жолымен жүрсе, «бізді үлкен хаос күтіп тұр». «Менің ойымша, болашақта қазіргідей бір эмитенті ғана болмайтын, мейлінше әділетті әлемдік валютаға қол жеткізу шарасы керек». Президенттің айтуынша, әлемдік валюта БҰҰ-да қабылданып, соған сәйкес комиссиялар бақылауында болуы тиіс.
Бизнес-форумда сонымен бірге Нұрсұлтан Назарбаев Қазақстан тарапының бірлесіп жүзеге асыруды көздейтін нақты жобалары мен ұсыныстары бар екендігін атап өтіп, Үндістан экономикасының көшбасшыларын Қазақстанға инвестиция салуға шақырды. Қазақстан Президенті Үндістанның Республика күні мерекесіне құрметті қонақ ретінде де қатысуда. Бір қызығы: Үндістанда мерекені тойлау кезінде шетелдік бір елдің президентін немесе премьер-министрін «басты қонақ» ретінде шақыру дәстүрі қалыптасыпты. Биыл құрметті қонақ ретінде Қазақстан Президенті шақырылған.
Мемлекет басшысы жұмыс сапары барысында Үндістан президенті Пратибха Девисингпен және сыртқы істер министрі Пранаб Мукхерджимен де келіссөздер жүргізді. Оның қорытындысы бойынша Қазақстан мен Үндістан арасында бірқатар құжаттарға, атап айтқанда, Бірлескен Декларацияға, Қазақстан Республикасының Дүниежүзілік сауда ұйымына кіруі жөніндегі хаттамаға, «ҚазМұнайГаз» Ұлттық компаниясы мен Үндістанның ONGC Mіttal Energy Ltd. компаниясы арасындағы келісімге, «Қазақатомөнеркәсібі» Ұлттық атом компаниясы мен Үндістанның Nuclear Power Corporatіon of Іndіa Ltd. корпорациясы арасындағы өзара түсіністік туралы меморандумға қол қойылды. Нұрсұлтан Назарбаев Үндістан президентімен және үкімет мүшелерімен болған келіссөздер мен қол қойылған құжаттар екі елдің өзара қарым-қатынасын стратегиялық әріптестік деңгейіне көтеріп отырғанын атап өтті.
Сондай-ақ Мемлекет басшысы өзінің «Сындарлы он жыл» және «Қазақстан жолы» кітаптарының хинди тіліндегі нұсқасының тұсаукесер рәсіміне қатысты. Осыдан соң Қазақстан Президентінің Үндістанның вице-президенті Хамид Ансаримен, үнді оппозициясының жетекшісі Л.Кришна Адванимен, «Біріккен прогрессивті альянс» басқарушы коалициясының төрайымы Соня Гандимен және бір топ жетекші үнді кәсіпкерлерімен кездесуі болды.