 Исламдық қаржыландыруды енгізетін заң жақын уақытта қабылданады
Қазақстанда исламдық қаржыландыру жүйесі енгізіледі. Тиісті заң жобасын Парламент Сенаты бірінші оқылымда мақұлдады. Заң осы жүйенің жұмыс істеуіне мүмкіндік бермей отырған заңдық кедергілерді жояды. Қолданысқа енген соң дәстүрлі қаржыландыруға балама көздер пайда болып, пайыздық мөлшерлемелердің төмендеуіне ықпал етеді. Себебі, исламдық қаржыландыру Шариғат қағидаттарына негізделген. Ең басты ерекшелігі, несие бергенде пайыздық мөлшерлеме қойып, пайда көруге тыйым салынады. Кездейсоқ жағдайлардан түскен кірістерді алуға да рұқсат жоқ. Исламдық банк, қаржыландыратын жобасының үлескер қатысушысы болады. Кәсіпорынның көретін шығыны мен пайдасын бірге бөліседі. Шариғат заңдарына сәйкес, арақ-шарап, темекі, қару-жарақ, халал емес тауарларды өндіруге, құмар ойындарына қаржы бөлуге және оларды саудалауға тыйым салынады. Мемлекет Басшысының ауқатты араб елдеріне жасаған сапарларында елімізде исламдық қаржы жүйесі енгізілсе, қомақты инвестициялар құюға ниетті екенін жеткізгендер көп, сондықтан қазіргідей дағдарыс уақытында бар мүмкіндікті пайдалану міндет, – деді Қаржы агенттігі төрайымының орынбасары.
Мұрат Байсынов, ҚР Қаржы нарығы және қаржы ұйымдарын реттеу мен қадағалау агенттігі төрайымының орынбасары:
- Дүниежүзінде исламдық қаржы институттарының жиынтық активтері 2008 жылы аяғына 15 процентке жуық орташа жылдық өсіммен 900 миллиард көлемінде болып отыр. Рейтингтік агенттіктердің болжамынша 2010 жылға дейін АҚШ-тың 2 триллион долларына жетуі мүмкін.
Бұл қаржыландыру жүйесі бойынша мұсылман елдерінде ғана емес, АҚШ, Европа, Оңтүстік Шығыс Азия мемлекеттерінде 300-ден аса банк тиімді жұмыс істейді. www.khabar.kz
|
