Швейцарияның Давос қаласында өтіп жатқан Дүниежүзілік экономикалық форум өз жұмысын жалғастыруда. Қазіргі әлемдік экономикада қалыптасып тұрған жағдайға байланысты биылғы форум бұрынғыларға қарағанда анағұрлым тартысты да сергек өтіп жатқан сыңайлы. 40 жылға таяу тарихы бар форумға тап биылғыдай бұрын-соңды әлем халқы назар аудармаған болар.
ПЕРЕС ЕРДОҒАННАН КЕШІРІМ СҰРАДЫ
Форумның соншалықты тартысты өтіп жатқанының тағы бір айғағы Түркия премьер-министрі Реджеп Ердоған мен Израиль президенті Шимон Перестің арасындағы дау-дамай.Қызу да эмоциялық әңгіме қазір бүкіл форумға қатысушылардың ғана емес, тіпті әлемдік БАҚ-тың басты тақырыбына айналып тұр. Әңгіме арқауы таяуда ғана әлем назарын өзіне аударып, қанша адамның мерт болуымен аяқталған Газа секторындағы оқиға еді. Қақтығыстағы өз елінің ұстанымын қорғап Израиль президенті 25 минут баяндама жасайды. Баяндамадан кейін Түркия премьер-министрі Реджеп Ердоған өз ойын білдірмек болады. Түрік премьері салған жерден әңгімені жұртты елең еткізіп бастайды: «Осы бір баяндамаға жиналған қауымның қол соққанын өте күйінетін факті деп санаймын, ол соғыста көп адам қаза тапты...». Осы сәтте әңгімені ушықтырмауды ойлады ма, әлде шынында да, уақыт шектеулі болды ма, сессия төрағасы «жарыссөзге уақыт жоқ» деп Ердоғанды тоқтатып тастайды. Жаратылысынан сабырлы да салмақты Ердоған «Президент Перес, сіз менен үлкенсіз және даусыңыз да зор. Мен сіздің өзіңізді кінәлідей көретініңізді сеземін, сондықтан да даусыңызды көтеріп сөйлеп тұрсыз. Сіздер адам өлтіріп жатырсыздар! Мен жағажайда балалардың өліп жатқанын кадрлар арқылы көрдім. Менің сөзім осымен бітті. Осы жағдайдан кейін Давосқа келмейтін болармын» деп шорт кесті. Салмақты әңгіме жүріп жатқанда аяқ астынан мынадай оқиғаның орын алғаны журналистер қауымына жақсы тақырып болды. Түрік премьерін маңайындағылар тоқтатпақ болған. Бірақ ол қайырылмады. Есесіне Реджеп Ердоғанды Түркия әуежайында мыңдаған адам Түркия мен Палестина жалауымен күтіп алды. Кеше Израиль президенті Шимон Перес түрік премьер-министрі Реджеп Ердоғаннан кешірім сұрады. Ердоғанның айтуынша, Перес телефон шалып, «Мен өткен оқиға үшін қатты өкінемін, тіпті достар арасында да кейде кикілжіңдер болып тұрады ғой. Мен әрқашанда Түркия мен елдің премьер-министрі – сізге үлкен құрметпен қараймын. Мен өзімді Түркия мен премьер Ердоғанның досы ретінде санаймын» деген. «Ер шекіспей бекіспейді» деген осы да. Ақпарат көзі....
Дінислам.Кз сайты - сайтта жарияланған мақалалар мен жаңалықтарға байланысты жазылған адамдардың көзқарасы мен ой-пікірлерінің жауапкершілігін жүктемейді.
adamdardi shybynsha qyryp esh shimirikpei otyrganyn qarash qudaidan qaitqyr peres
