[19.02.2009.] Бушқа аяқ киім лақтырған тілшінің үстінен сот ісі басталды
04:45
Бушқа аяқ киім лақтырған тілшінің үстінен сот ісі басталды
Ирактың орталық қылмыстық соты жергілікті «әл-Багдадия» тәуелсіз телеарнасының тілшісі Мунтазер әз-Зейдидің ісін қарауды бастады. Тілші АҚШ президенті Джордж Буштың Бағдатқа сапары кезінде оған бәтеңке лақтырып, балағаттаған болатын. Мунтазер әз-Зейдиге шетелдік басшыға шабуыл жасады деген айып тағылып отыр. Сот үкімімен ол 15 жылға бас бостандығынан айырылуы мүмкін. Журналистің қорғаушылары 2003 жылы Иракқа АҚШ әскерінің басып кіруін, бұның салдарынан айыпталушыны ашу-ыза кернегенін ескеру қажет дейді. Егер сот бұл уәжді ескерсе, жаза екі жылға қысқартылуы ықтимал. 2008 жылдың 14 желтоқсанында АҚШ-тың бұрынғы президенті Джордж Буштың Ирак премьер-министрі Нури әл-Маликимен өткен кездесуінде журналистердің бірі АҚШ президентіне аяқ киім лақтырған болатын. Ол сондай-ақ, «Бұл саған жесірлер мен жетімдер және Иракта қаза тапқандар үшін» деген еді. 30 жастағы ирак тілшісінің бұл әрекетін араб елдерінің көбі қолдап, оны қорғауға 100-ден астам адвокат тілек білдірген. Олардың арасында Саддам Хусейннің де қорғаушысы бар. Ал, қаңтар айының соңында Бушқа лақтырылған бәтеңкеге ескерткіш орнатылып, бірақ ол көп ұзамай алынып тасталды. Хабар агенттігі.
Дінислам.Кз сайты - сайтта жарияланған мақалалар мен жаңалықтарға байланысты жазылған адамдардың көзқарасы мен ой-пікірлерінің жауапкершілігін жүктемейді.
