[06.08.2009.] ДІНИ КУРСҚА СЕКСЕННЕН АСҚАН ӘЖЕ ДЕ КЕЛІП ЖҮР
17:58
ҚМДБ-ның бастамасымен жүзеге асып жатқан бірқатар игі-шаралар бүгінде тұрақты жалғасын тауып келеді. Соның бірі - діни сауат ашу курстары дер едік. Мүфтиат тарапынан қолға алынған мұндай игі істер еліміздің жер-жердегі мешіттерде дәстүрге айналуда. Алматы қаласының Бостандық ауданында орналасқан «Орбита-3» мешітінің жанынан арнайы ашылған діни сауат ашу курсы да өз жұмысын жан-жақты жандандырып келеді. Жүргізіліп келе жатқан сабақтарға жазылған шәкірттердің саны күн санап артуы, көңіл қуантады. Бүгінде мешітімізден жеті жастағы жасы былай тұрсын, жетпіс жастағы жасамысы да діни сауатын ашып жатқандар да баршылық. «Тал бесіктен - жер бесікке дейін ілім іздеңдер»,- деген Пайғамбарымыздың (с.ғ.с.) хадисіне тағы бір айғақ ретінде сексеннің сеңгірінен асқан Бәшкен әже де «қартайдым-ау» демей, білім іздеп жатқаны, өзгеге үлкен үлгі боларлық жайт. Жоғары оқу орындарында тәлім алып жатқан студенттер де оқу курсына арнайы келіп, діни білімдерін жетілдіруде. Мешітінің бас имамы Асан Әбдіқұлұлының жетекшілігімен жүргізіліп келе жатқан дәрістер жүйелі түрде берілуде. Ал, жазғы демалыстың әр айына мектеп оқушыларына арнайы бағдарлама жасалған. Құран әліппесі, әдеп, дұғалар, пайғамбарлар өмірі бойынша дәрістер жүргізіліп жатыр. Балаларға әр жұма сайын Исламның ғажайып құндылықтарын паш ететін бейнефильмдерді көрсету де діни сауат ашу курсының оқу жоспарына енгізілген. Маусым айында мешітіміздің жанынан білім алуға жазылған балалардың бір тобы білім алды. Ал, шілде айында дәріс алып жатқан мектеп оқушыларының саны 40-тан асып жығылады. Жалпы, мұнда саны жүзге жуық шәкірт білім алуда. «Орбита» мешітінің баспасөз қызметі. http://www.muftyat.kz/
Дінислам.Кз сайты - сайтта жарияланған мақалалар мен жаңалықтарға байланысты жазылған адамдардың көзқарасы мен ой-пікірлерінің жауапкершілігін жүктемейді.
