[12.08.2009.] «Дінтану негіздері» мектепте оқытылатыны рас па?
06:09
Таяуда теледидардан алдағы оқу жылында мектеп бағдарламасына «Дінтану негіздері» атты пән енгізіледі дегенді құлағым шалып қалды. Мұндай пәнді енгізуге біздің мемлекеттің қаншалықты әзірлігі мені алаңдатады. Гүлбаршын СЕРҒАЗЫҚЫЗЫ, Алматы қаласы Ағымдағы оқу жылында мектеп бағдарламасына «Дінтану негіздері» атты пән емес, факультативтік курс қосылатын болды. Бұл туралы таяуда ҚР Білім және ғылым министрлігінде өткен брифингте аталған ведомствоның ресми өкілі Серік Ырсалиев мәлім еткен болатын. Оның сөзіне қарағанда, жаңа пән дін және оның қандай ағымдары бар екендігі туралы балаларға түсінік береді. Қазіргі уақытта аталған пән бойынша оқу құралдары дайындалып жатыр. Факультативтік курсты тарихшылар, дінтанушылар, мәдениеттанушылар беретін болады. Жалпы, қазір осы пәннен дәріс беретін мұғалімдер біліктілігін арттыру курстарынан өткен. Еліміз көпұлтты, осыған орай, бұл халық арасында діни қайшылықтар орын алмауы үшін жасалып отыр. Сонымен қатар осы оқу жылынан бастап, білім беру мазмұнына бірқатар толықтырулар енгізілді. Атап айтқанда, 10-11 сыныптарда көлік жүргізушілерін даярлау, ал төменгі сыныптарда қаржы сауаттылығының негіздері факультативтік курстары және жоғары сыныптарда қаржы білімі бойынша тиісті жаңа пәндер енгізілді. "Алаш айнасы" газеті.
Дінислам.Кз сайты - сайтта жарияланған мақалалар мен жаңалықтарға байланысты жазылған адамдардың көзқарасы мен ой-пікірлерінің жауапкершілігін жүктемейді.
