Өткен сенбі күні Қарағанды облысы Шет ауданына қарасты Еркіндік ауылында жаңа мешіт ашылды. Имандылық үйінің салтанатты ашылу рәсіміне еліміздің бас мүфтиі шейх Әбсаттар қажы Дербісәлі қатысты. Екі қабатты имандылық үйі – Еркіндік ауылында ашылып отырған тұңғыш мешіт. Ата-бабамыздың ақ жолын жалғастырып, халқымыздың рухани қажеттілігін өтеу мақсатында пайдалануға берілген ғибадатханада бір мезгілде жүзге жуық адам намазға жығыла алады. Жаңадан бой көтерген имандылық үйіне қажылыққа үш рет барып келген, ауылдың қадірлі ақсақалы болған Қален қажының шөбересі – Тұрсын Жәкештегінің есімі берілді. Ауыл тұрғындарын осы қуанышпен құттықтаған Бас мүфти уақыт өткен сайын елімізде имандылық үйлерінің көптеп салынып жатқанын тілге тиек етті. Мәселен, алғаш Тәуелсіздік алған жылдары республикада бар болғаны 68 мешіт болған болса, қазір олардың саны екі мыңнан асып жығылады екен. Ал мына мешіт Қарағанды облысы бойынша ашылған 139-имандылық үйі көрінеді. Әбсаттар қажы Дербісәлі, ҚР бас мүфтиі: – «Құдайдікі – парыз, патшанікі – уәжіп» деген аталы сөзді берік ұстанған елміз. Тәуелсіз мемлекетімізде ислам дінінің кеңінен қанат жайып, таған тартуына ерекше көңіл бөлетін Президентіміздің сындарлы саясатының арқасында елімізде уақыт озған сайын зәулім мешіттер бой көтеріп жатыр. Жаңа мешіттің ашылуына орай ас беріліп, республикалық ақындар айтысы ұйымдастырылды. Оған еліміздің әр аймағынан сегіз ақын қатысты. Ислам дініне арналған айтыста бірінші орынды Жандарбек Бұлғақов иеленсе, екінші орын қарағандылық Дидар Қамиевке бұйырды. Айтыс жеңімпаздары ақшалай сыйлықпен марапатталды. Жансая Әбдібекова. "Алаш айнасы" газеті.
Дінислам.Кз сайты - сайтта жарияланған мақалалар мен жаңалықтарға байланысты жазылған адамдардың көзқарасы мен ой-пікірлерінің жауапкершілігін жүктемейді.
