ИКҰ Бас хатшылығы мұсылман елдерін Қазақстан президентінің 29 тамызды Бүкіләлемдік ядролық қарудан бас тарту күні деп жариялау туралы бастамасын қолдауға шақырды Ислам Конференциясы ұйымының Бас хатшылығы бүгін осы ұйымға мүше мұсылман елдерін Қазақстан президенті Нұрсұлтан Назарбаевтың 29 тамызды Бүкіләлемдік ядролық қарудан бас тарту күні деп жариялау туралы бастамасын қолдауға шақырып үндеу жариялады, деп хабарлайды Kazakhstan Today ҚР СІМ-нің баспасөз қызметіне сілтеме жасап. Баспасөз қызметінің ақпаратына сәйкес, Мұсылман дүниесінің 57 еліне арналған үндеуде тәуелсіз Қазақстан елінің тарихы ядролық қарусыздану үрдістерімен тікелей байланыста екендігі айтылған. ҚР СІМ мәліметінше, қазіргі кезде Сауд Арабиясы мен Оман Сұлтандығы Қазақстан көшбасшысының бастамасын қолдайтындықтарын білдіріп, Нью - Йорктегі тұрақты өкілдіктері арқылы Қазақстан тарапы әзірлеудегі БҰҰ Бас Ассамблеясының 29 тамыз Бүкіләлемдік ядролық қарудан бас тарту күні деп жариялау туралы резолюциның жобасына келісуге дайын екендіктерін білдіріп үлгерді. "Тәуелсіздікке қол жетісімен 1991 жылдың тамыз айында Елбасы Н. Назарбаев Семей сынақ полигонын жабу туралы жарлыққа қол қойды. 2006 жылы 8 қыркүйекте Семейде Орталық Азия елдері БҰҰ мен бірлесе отырып Орталық азия аймағында ядролық қарудан ада аумақ құру туралы келісімге қол қойды. Аталмыш келісімге қол қойылуы тарихи мәнге ие болумен қатар ИКҰ ға мүше мемлекеттердің халықаралық қауіпсіздікке ұжымдық үлес қосуға ынталылығын және қаруды таратпау қағидаттарына берік екендіктерін дәлелдейді",- делінген хабарламада. Kazakhstan Today.
Дінислам.Кз сайты - сайтта жарияланған мақалалар мен жаңалықтарға байланысты жазылған адамдардың көзқарасы мен ой-пікірлерінің жауапкершілігін жүктемейді.
