[24.08.2009.] Ақтаудағы орталық мешітте облыс әкімі Қырымбек Көшербаев мұсылмандарды ораза айымен құттықтады
13:32
Ақтаудағы орталық мешітте облыс әкімі Қырымбек Көшербаев мұсылмандарды ораза айымен құттықтап, Қазақстан мұсылмандары діни басқармасының бұйрығымен облыстың өкіл имамдығына келген жаңа бас имамды таныстырды, деп хабарлайды ҚазАқпарат тілшісі. Облыс әкімі Қырымбек Көшербаев Ислам дінінің ең қасиетті де, құрметті айы Рамазанды қарсы алған жамағатты құттықтап, ораза ұстаған жандардың ниеттерінің қабыл болуына тілектестік білдірді. Облыстың соңғы жылдары қол жеткен жетістіктеріне тоқталған Қырымбек Елеуұлы маңғыстаулық жамағат алдында жаңа өкіл имам, Бекет ата мешітінің бас имамы Тілепберген Алламжарұлы Жакиевтің жұмысына сәттілік тіледі. Ал көп жылдар бойы Қазақстан мұсылмандары діни басқармасының Маңғыстаудағы өкіл имамы, орталық Бекет ата мешітінің бас имамы қызметін абыроймен атқарған Дүйсен қажы Хасниязовқа алғыс айтып, ризашылығын білдірді. Орталық мешіттің уағыз-насихат бөлімінің меңгерушісі Айғабыл Шәденов уағыз айтып, жиналған қауымның ораза турасындағы сұрақтарына жауап берді. Ораза тұтқан жан ғибадаты қабыл болуы үшін неден тиылып, неден сақтануы керек, оразаның кімдерге парыз екендігі, оразаның бұзылатын және бұзылмайтын кездері, пітір садақасы сияқты сан алуан сауалдар жауабын тапты. Ал мешіт ақсақалдары игі тілекпен ақ батасын берді. АҚТАУ. ҚазАқпарат.
Дінислам.Кз сайты - сайтта жарияланған мақалалар мен жаңалықтарға байланысты жазылған адамдардың көзқарасы мен ой-пікірлерінің жауапкершілігін жүктемейді.
