Алматы қаласындағы «Үміт үйі» атты балалар үйі көп жылдан бері Қазақстан мұсылмандары діни басқармасының қамқорлығында. Бұл мекеме 1994 жылы ашылған болатын. Содан бері мұнда 400-ден астам бала тәрбиеленді. Ал қазір 60 балаға қамқорлық көрсетілуде. Бұлар мүлдем асыраушысы жоқ сәбилер емес. Бірінің әкесі, бірінің анасы бар. Олар мұнда естияр болғанша тәрбиеленеді. Балалар үйінің ұжымы сәбилерге ана тілін, ұлттық салт-дәстүрді барынша үйретеді. Еліміздің бас мүфтиі Әбсаттар қажы Дербісәлі «әсіресе, Рамазан айында осындай балалар үйлері мен қарттар үйлеріне мұсылмандар көбірек келіп, мұқтаж жандарға қайырымдылық жасауы керек»,-дейді. Қажы сәбилерге ақ тілек арнап, сүндетке отырған егіз ұлға батасын берді. Ол мемлекет тарапынан балалар үйлеріне көрсетіліп жатқан қамқорлыққа көңілі толатынын жеткізді.
Әбсаттар қажы Дербісәлі, ҚМДБ-ның бас мүфтиі: - Бұл кісілер енді ештемеге мұқтажымыз жоқ, бәрі жақсы деп жатыр. Бірақ енді назарда ұстаған бәрібір керек. Біздің халқымыз ешқашан жетім балаларды жылатпаған ғой. Жетім көрсең жебей жүр дейді. Әсіресе, біздің дінімізде ата-анасы жоқ балаларға, жетім балаларға үлкен қамқорлық көрсетуді, жақсылық жасауды, молырақ мейірімділікпен қарауға шақырады. Міне, қазір қасиетті Рамазан айы. Бұл мейірім айы, шапағат айы, қайырым айы. Олай болатын болса осы тәрбиеленіп жатқан балаларымызға кіріп, маңдайынан сипап, бата беріп кеткенді жөн көрдік. "Хабар агенттігі"
Дінислам.Кз сайты - сайтта жарияланған мақалалар мен жаңалықтарға байланысты жазылған адамдардың көзқарасы мен ой-пікірлерінің жауапкершілігін жүктемейді.
