17 қазан күні Қазақстан мұсылмандары діни басқармасының төрағасы, Бас мүфти Әбсаттар қажы Дербісәлі арнайы іссапармен Шымкент қаласына келді. Дінбасыны облыс орталығына кіре берістегі қақпадан ҚМДБ-ның ОҚО бойынша өкіл имамы Ахметжан қажы Керімбек пен бір топ зиялы қауым өкілдері күтіп алды. Арнайы көлікке жайғасқан бір топ қонақтар Түркістан қаласына аттанып кетті. 18 қазан күні Түркістан қаласы, Бабайқорған ауылдық округінде жаңадан салынған «Бабай» мешітінің ашылу рәсімі өтті. Мешіт ауылдың орталығында салынған, оның әсем де сәулетті ғимараты өзге мешіттерге ұқсамайтындығы байқалады. Мешіт шығыстық үлгіде салынған. Қабырғасы күйген қызыл кірпішпен қаланып, сырты мәрмәр таспен толық қапталған. Бір үлкен күмбезі, екі мұнарасы бар. Мешіттің алаңқайларына тас кілемдер төселген. Соның ішкі қабырғаларына қасиетті құран аяттары мен пайғамбарымыздың (с.ғ.с.) хадис шәріптері жазылған. Аллаһ үйінде бір мезгілде мыңға тарта намазхан ғибадат жасай алады. Мешіттің ресми ашылуына Қазақстан мұсылмандары діни басқармасының төрағасы, Бас мүфти Әбсаттар қажы Дербісәлі хазрет қатысты. Мешіттің салтанатты ашылу рәсімінде лентаны қиып, алғашқы сөзді алған Дінбасы Әбсаттар қажы Дербісәлі хазрет бұл мешіттің ертеңгі күні өркендеп келе жатқан еліміздің рухани тұрғыдан дамуына лайықты үлес қосатынын, өскелең жастардың бойына тәлім-тәрбие, имандылық қағидаттарын сіңіретін орын болатындығын қадап айтты. Жалпы, мешіт қызметі қандай болу керектігіне тоқталды. Сонымен бірге, мешітті салушы азамат Әшірбек Шерұлы Құрбанов мырзаға алғысын жеткізді. Соңында «Бабай» мешітінің кітапханасына қасиетті Құран Кәрімді силады. Бұдан кейін бірқатар қонақтар мен жергілікті басшылар жұртшылықты мешіттің ашылуымен құттықтады. Кездесу барысында Дінбасы «Қазақстан-Шымкент», «Айғақ» телеарналарымен т.б. БАҚ өкілдеріне сұхбат берді. Осы күні түс қайта Дінбасы Әбсаттар қажы Дербісәлі хазрет Түркістан қаласындағы Әбдімәлік Әбдірайымов басқаратын «Түркістан» дайындық курсында болып, тыныс-тіршілігімен танысты. Дайындық курсының оқу базасы толық заманауи тұрғыда жасалған. 100 шәкіртке арналған жатақхана мен асхана, ашық спорт алаңы, арнайы жәми мешіті, екі қабаттан тұратын оқу ғимараты бар курста дайындық жасауға толық мүмкіндіктер бар. Бір айта кетер мәселе, облыс орталығындағы «Шымкент медресесіне» шәкірттер дайындауда бұл дайындық курсының үлкен ықпалы болды. Дінбасы келесі жылдан бастап, бұл дайындық курсына «Түркістан медресесі» дәрежесі берілетіндігін айтып, қуанышты хабарды жеткізді. Осы күні кешкісін Дінбасы облыс орталығы - Шымкент қаласындағы «Шымкент медресесінде» болып, жұмыстарымен танысты. Бас мүфти келесі жылдан бастап бұл медресені институтқа айналдыруға ұйғарым жасалғанын айтты. 19 қазан күні Бас мүфти Әбсаттар қажы Дербісәлі хазрет облыстық Ж.Шанин атындағы қазақ сазды драма театрында болып, театр басшылығымен өнер саласындағы бірқатар мәселелерді әңгімелесті. Атап айтқанда, Әбсаттар қажы Дербісәлі хазрет пен Байғали Есеналиевтің бірлесе отырып жазған Мұхаммед Хайдар Дулатидың өмірі жөніндегі пъесаның премьерасы ағымдағы жылғы 4 қараша күні қойылуы жоспарланып отыр. Премьераны алдын ала пысықтау мақсатында Мұхаммед Хайдар Дулати туралы Ш.Айманов атындағы киностудиядан әзірленген деректі фильм тамашаланды. Фильмнің сенарийін Дінбасы Әбсаттар қажы Дербісәлі жазған. Фильмнен кейін Дінбасы көрермендерге М.Х.Дулати жөніндегі өзінің зерттеулерін айтып өтіп, жан-жақты әңгіме жүргізді. Осы күні Шымкент әуежайынан Дінбасы Астанаға қаласына ұшып кетті. ҚМДБ-ның Оңтүстік Қазақстан облысы бойынша өкілдігінің баспасөз қызметі. ҚМДБ:
Дінислам.Кз сайты - сайтта жарияланған мақалалар мен жаңалықтарға байланысты жазылған адамдардың көзқарасы мен ой-пікірлерінің жауапкершілігін жүктемейді.
