Астанада алғаш рет азан айтудан сайыс өтті. Азан исламның бес парызының бірі - намазға шақыруды білдіреді. Рухани бәйгеге төрелік еткен қазылар азан шақыруды өз нақышына келтіре айтқан жезтаңдайларды сыннан өткізді. Мұндай байқау елімізде бұрын-соңды болмағандықтан, ұйымдастырушылар Түркиядан кәнігі ұстаздарды шақыртып отыр. Тақырыпты азанның кереметтеріне қанығып қайтқан тілшіміз жалғастырады. «Азан» сөзі араб тілінен тікелей аударғанда - «хабар беру», «білдіру» дегенді білдіреді. Ал терминдік мағынасы парыз намаздарының уақыттарын білдіру үшін айтылатын сөздердің жиынтығы. Жалпы Ислам тарихында алғашқы азанды Медине қаласында хазірет Біләл айтқан. Азанның сөзі мен тәртібін алғашқыда 7 бірдей сахаба түсінде көріп, солардың айтуы арқылы өмірге келді. Содан бері жер бетінде азан бір сәтте айтылмай қалған емес. Азанның кереметтерінің бірі ретінде, айға алғаш барған адам - Нил Армстронг, азан дауысын көктен естіген екен. Алайда ол бұл дауыстың азан екенін 14 жыл өткеннен соң, Египетке барғанда білген. Бүгінгі шара азанның маңызы мен азаншының Исламда алар орнын насихаттауға арналып отыр.
Қалижан Заңқоев, «Нұр- Астана» мешітінің бас имамы: - Бұған дейін Құран оқу секілді сайыстар өткіздік. Бірақ адам баласын жақсылыққа шақыратын, үлкен ғибадат - азан жайлы мәлімет аз. Түркияда жиі өткізіліп тұрады. Олар азанның әдемі үнін естіп, мешіттерге ағылып жатады.
Алғаш рет өтіп отырған рухани сайысты ұйымдастырушылар байқауды екі топқа бөліп өткізді. Біріншісінде еліміздегі мешіттерден келген 20 азаншы біліктіліктерін сынаса, екінші топта Азан шақыруға әуес 33 жас өзара жарысты. Олардың жас ерекшеліктеріне шектеу қойылмады. Астаналық Жұбаныш - азаншылардың ең кішісі. Жамағат алдында азан шақырып жүргеніне бір жыл болыпты.
Жұбаныш Жұмағалиев, жарысқа қатысушы: - Азанның пайдасы мол. Мысалы, ашуланып тұрған адам азанды естігенде жақсы күйге түседі.
Бұл амал жамағатты намазға шақыру үшін айтылатындықтан, азаншыға қойылатын басты талаптың бірі - оның даусының зор болуы. Қазылар сайыскерлердің әдемі әуезімен қатар, оқу нақышын және азанның тарихынан да сұрақтар қойып отырды. Ұйымдастырушылар үміткерлерді бағалау үшін қазылар алқасына Анкара қаласының ең үздік азан шақырушысын шақырыпты. Бұл сайыста жеңімпаз да анықталды. Мешіт қызметкерлері ішінде бас жүлде Шымкент қаласының азаншысы Әлім Ерімбетовке бұйырды. Ал жастардың ішінде Астана қалалық медресесінің студенті Серік Темірғалиев жезтаңдай - атанды. Қатысушылардың бәрі қошеметсіз қалған жоқ. www.ktk.kz
Дінислам.Кз сайты - сайтта жарияланған мақалалар мен жаңалықтарға байланысты жазылған адамдардың көзқарасы мен ой-пікірлерінің жауапкершілігін жүктемейді.
