[22.10.2009.] Елімізде есірткімен теңдес шөп қоспалары интернет арқылы еркін сатылуда - 22 Октября 2009

Еркін сатылып жатқан өсімдік қоспалары немесе түсінікті тілмен айтсақ, шөптік “микстердің” әсері анашамен бірдей. Құрамында есірткі қатарына жататын заттар болғандықтан, жуырда ғана Ресейдің бас санитарлық дәрігері Геннадий Онищенко шөптік “микстерді” сатуға тыйым салған болатын. Енді Голландияда өндірілетін бұл қоспа солтүстіктегі көршімізді айналып өтіп, Қазақстанға тасымалдануда. Әзірге шөптік “микстерге” біздің елде тыйым салынбаған және ғаламтор арқылы еркін саудаланып жатыр.
Интернетте шөптік “микстерден” алатын әсерің жайындағы жарнама бірінен-бірі өтеді. Тек сол ғаламтор бетіндегі телефон нөмірін терсеңіз жетіп жатыр. Мекен-жайға өздері әкеліп береді. Керек десеңіз, тауардың сертификатын да көрсетеді.
Мұнда өсімдік қоспаларының түр-түрі бар. Жастар арасында танымал “микстер” – Спайс пен Джин да осында. Бағасы 2,5 мың теңгеден басталады. Және сайттың басты бетіне заңсыз тауар сатпаймыз деп жазып қойған. Бірақ неге екені белгісіз, клиенттермен кездесуді барынша құпия жүргізгілері келеді. «Егер полицияның қолына түссеңдер, бізге сілтеме жасаңдар» - дейді.
Барлығы заңды дегенмен, тауардың сыртында не телефон нөмірі, не шығарушының мекен-жайы көрсетілмеген. Тек «құрамы шөптерден ғана тұратын еш зияны жоқ» деп жазылыпты. Бірақ мамандар оның құрамында есірткі іспеттес қоспалардың бар екенін анықтап отыр.

Әсет Мәдиев, ҚР Әділет министрлігі, Есірткіні бақылау жөніндегі ұлттық зертхананың меңгерушісі:
- Ресейдің бас санитарлық дәрігері Онищенко тыйым салған. Өйткені зерттеу кезінде шөптік қоспалардың құрамындағы кейбір заттар есірткіге ұқсас екендігі анықталды. Бірақ есірткінің қай түріне жататыны нақты айтылмаған.

Шөптік қоспалардың құрамында табылған заттар марихуана мен анашаның негізгі құрамдас бөлігі болып табылады. Және оған тез тәуелді болып қаласың.
Кептірліген шөп сияқты, иісі де жағымды. Оны алғаш пайдаланған адам қызығып, мәңгі тәуелді болуға мәжбүр. Рахат өмірге жолдаманың құны - 2,5 теңгеден басталады. Бір орам 3 рет қолдануға жетеді. Қолданған адам 6 сағат бойы өзге әлемде жүргендей сезінеді. Есін жиған соң есеңгіреп қалады.

Марс Берімбаев, нарколог-психотерапевт:
- Тәуелділік пайда болады. Марихуана, анаша есірткі тобына енеді. Неге? Өйткені психологиялық тәуелділік пайда болады. Бұған да тәуелділік пайда болады.

Бізге өсімдік қоспаларын сатқан жігіттер тауар Голландиядан Ресейге, ал Ресейден Қазақстанға жетеді деген. Мұндай “микстерге” Ресейде де, Еуропаның басқа да көптеген елдерінде тыйым салынған. Ал бізде сатылатын өсімдік қоспаларының құрамындағы заттар заңмен тыйым салынған есірткілердің тізімнен табылмады. Сараптамашылар “микстер” елімізге жаңадан әкелінгендіктен тізімге еніп үлгермеген шығар деседі. kaz.ktk.kz.