[04.11.2010.] Қасиетті Мекке ғана мұсылмандардың құбласы. Түркістан - екінші Мекке деп шатасып, шала бүлінбейік. - 4 Ноября 2010

Асыл дініміздегі бес парыздың бірі – қажылық. Мұны «Алланың – бір, Оның елшісі әрі құлы – Мұхаммед» екендігін жүрегімен ұғынып, хақ дін туралы дұрыс түсінікті түйсігіне түйген исі мұсылманның бәрі біледі. Мүмін егер әлеуметтік жағдайы болса, қажылық амалын орындауы – парыз. Ал, тұрмысы көтеріп, шамасы келсе тағы қажылыққа бару сауапты амал. Ол барғаны үшін зор сауапқа ие болады. Тұрмыстық әлеуеті жоғары және парыз екенін біле тұра бармаған жағдайда да Алланың мол сауабымен Жәннаттынан құр қалғаны. Себебі сол, Пайғамбарымыз Мұхаммедтің (Алланың оған игілігі мен сәлемі болсын) өнегелі өсиетіне сүйенсек, «Бір рет умраға барғаннан кейін, екінші рет умраға бару – арасында істелген күнәларға кәффарат (күнәні кетіретін амал) болса, шариғат талабына сай орындалған қажылықтың сыйы тек Жәннәт болады». Міне, биыл қасиетті парызды өтеу үшін елімізден мыңдаған мұсылман бауырлар қасиетті Қағбаға, яғни Мекке-Мәдина қалаларына бет алмақ. Қазір аймақтарда алғашқы қажылық парызын өтеуге ниет етіп, бел буғандарға білікті де білімді имамдар кеңес беріп, алдын ала дайындық шараларын ұйымдастырды. Қазақстан Мұсылмандары Діни басқармасының төрағасы, бас мүфти, шейх Әбсаттар қажы Дербісәлінің былтыр айтқан сөзі есіме еріксіз оралып отыр. Сол кезде қазірет: «Парызын өтеген адам: «Қажылыққа бардым, іс бітті», - емес, үнемі: «Қажылығым қабыл болса екен. Қажылыққа барып алған сауабымды Алла Тағаланың әміріне қарсы келіп, жойып алмасам еді», - деген ойда болғаны абзал екендігін айтқан болатын. Сондықтан қажылыққа бармас бұрын ниетті түзу етіп, сананы сабырлыққа дайындаған жөн. Соңғы кездері жұртшылық арасында: «Түркістан – екінші Мекке. Түркістанға жеті рет барсаң, бір рет қажылыққа барғанмен тең», - деген қаңқу сөз желдей есіп тұр. Тіпті, Меккеге емес, Түркістанға арнайы көш түзеп жүргендер де жетерлік. Мұны хакім Абайша айтсақ: «Білімсіздік белгісі, ол – баяғы». Енді, оған иланғандарға әрине, айтарымыз ең алдымен иманын күшейтіп, ілім іздену қажет. Ал, жер бетінде Исламға тең келетін дін жоқ. Сондықтан да мұсылмандардың қыбласы болған Мекке мен «Бәйтүл-Харам» ешқандай өлке мен өңірге теңдессіз орын. Айта кетерлік жайт, Қасиетті Мекке-Мәдина қалаларына жаһангер ретінде баратын кейбір азаматтар да жиі кездесіп жүр. Бұл да дұрыс емес. Ислам – кейбіреулердің түсінігінде қалыптасқандай, харам мен халалды ғана айыратын дін емес. Ислам – мәңгілік бақытқа жетелейтін имандылықтың иірімдері тоғысқан тура жолдың асыл діні. Мейірім мен ізгіліктің, адамгершілік пен асыл құндылықтардың қайнар бұлағы. Ал, салт-санасы мен тұрмыс-тіршілігін хақ дінмен ұштастырған қазақ халқы әлі күнге дейін бұл бағыттан еш тайған емес. Еліміздің түкпір-түкпірінде мұнарасы менмұндалаған мешіттердің ашылып, онда Жаратушы Иемізге құлшылық ететін жамағат пен жастар қатарының қалыңдауы сөзімізге айқын дәлел. Алла Тағала берік қалпымыздан айырмасын. Ақпарат көзі..