 КІНДІК ТЕСІП, СЫРҒА ТАҒУ ЖАСТАРЫМЫЗҒА ҚАЙДАН ЖҰҚҚАН?
Иә, бүгінгі күнде жастарымыздың Еуропаға еліктеуі өршіп тұр. Бұған кім кінәлі?
Қазір заман өркендеген кез. Бірақ, өркендеген деп айта аламыз ба? Себебі, жастарымыз күннен күнге жалаңаштанып барады. Бағзы замандардағы алғашқы қауым адамдары сияқты. Бұлай деп айту себебім, олар матаның жоқтығынан, ұятты жерлерін ғана жауып жүрген. Ал, біз ше? Бізде барлығы жеткілікті бола тұра, жастарымыз мата жетпейтіндей кіндіктерін «мен мұндалап» тұрғандай күйде киінеді. Сол кіндікті тестіріп, сырға салудың не сәні бар?
Қыз баланың денесі жабық жүргені абзал. Көптеген қазақ қыздары орысша сөйлеп, кіндіктерін ашып, тілдерін, мұрындарын т.б. жерлерін тесіп, сырға салып өздерін «әдемі» санайды. Далада, көшеде, тіпті, автобустарда кіндіктерін ашқан қыздарды көрсем, үлкендер былай тұрсын, өз басым оларға қарауға ұяламын. Қаладағы адам таситын өзі тар, өзі аласа шағын автобустарға мінген кезде, қыздарымыз ер адамдардың, үлкендердің алдында, өздері «әдемі» санаған киімдерімен барлық денесін көрсетіп тұрғаны. Бұған не дейсің?
Бүгінде біраз қыздардың ауызында - темекі, қолдарында - сыра, астарында - машина. Олар болашақ ана ғой. Сонда олардан қандай ұрпақ күтуге болады?
Міне, осындай қылықтар жасау қаракөз қазақ қыздарына лайық па? Жо-жоқ! Әрине, мұндай сәнқойлық біздерге өрескел нәрсе, Алла тағала біздерге денемізді аманат етті. Ал, аманатқа қиянат жасау - үлкен күнә. Ертең Алла тағала алдында сол денеміздің әр тесігіне, әр тыртығына жауап береміз. Қабірдегі дене мүшеңді қалай пайдаландың деген сұраққа қалай жауап береміз? Бұл дүние - бес күндік, жалған. Мәңгі өмір әлі алда.
Қазақсың ба? Қазақстан мемлекетінде тұрасың ба? Қазақша сөйле. Қазақ деген қонақжай халық. Мемлекетімізде қанша ұлт өкілдері тұрады. Міне, солар Қазақстанда тұрып, өз тілдерін, діндерін, салт-дәстүрін сақтап қалған. Ал, біздің қазақтар, керісінше, басқаларға еліктеп, өз тілдерін, діндерін, қазақтығын жоғалта бастаған. Екі қазақтың басы қосылса, тіл-дерін орысша сындырып, былдырлап сөйлесе бастайды. Қазақ жігіттері басқа ұлт өкілдерінен жар алуда. Әрине, алсын. Бірақ, оларды өздеріне тартқанның орнына, өздері де орысшаланып, балаларын орысша тәрбиелеуде. Ал, қаракөз қыздарымыз басқа ұлт өкілдеріне тұрмысқа шығып, өздерінің қазақ деген ұлтының санын кемітуде. Қадір ақынның: «Өзге тілдің бәрін біл, өз тіліңді құрметте» дегеніндей, өзің үшін, өз ұлтың үшін басқа тілдерді біл, бірақ өз тіліңді ұмытпа, әрі оның құндылығын сақта.
Иә, менің қаракөз апа-сіңлілерім! Сіздерге айтарым, өзімізідң қазақ деген атымызды, дінімізді, тілімізді жоғалтпайық. Қайта, өсіп келе жатқан жас ұрпақ - біздің болашағымыз. Мемлекетімізді көркейтетін де, керісінше, құрдымға түсіретін де сол - жастар. Міне, сол жас ұрпаққа үлгі-өнеге бола аламыз ба? Осындай күрделі мәселені шешетін де ұлт болашағы - жастар екенін әсте ұмытпайық.
Маржан ТӨЛЕУҚАЖЫҚЫЗЫ, «Ахмадия-Зура» мешітінің ұстазы, Луговой ауылы, Целиноград ауданы, Ақмола облысы.
Ақпарат көзі: http://muftyat.kz/1127-kindik-tesip-syr1170a-ta1170u-zhastarymyz1170a.html
|
Жайқалған жасыл желекті жаз жеткелі жалаңаштардың жағдайы жанды жегідей жеп жүр. Жан-жағымызды жартылай жалаңаш – жарымжандар жайлаған, жабайылардың жанында жүргендейміз. Жартылай жалаңаштыққа желігу жақсылыққа жет-кізбейді. Жалпы, жұрттың жамалының жалаңаштығынан жанының жалаңаштығы жаман.Жаратушының жақсылықтарынан жиреніп, жануардан жаман жүгенсіздік жолымен жүру жамандықтың жегіне жеткізді. 
